移民澳洲小百科 - 移民顧問之煉成 2

上回提到排除萬難，花錢花時間花心機花努力 (花到眼都花埋@.@) 後終於成功向 Office of Migration Agents Registration Authority – OMARA (www.mara.gov.au) 註冊到移民代理既身份，咁然後呢？係咪好似唔少專業團體咁只係年年俾錢續會就搞掂？當然唔係！

為左符合每一年既續牌資格，持牌代理除左要持續符合購買專業責任保險同持有最新版本的法例既要求外，亦需要完成年度的法定進修要求 (Continuing Professional Development – CPD)。如果以舊制 Graduate Certificate Level 學歷註冊既代理更需要於第一年註冊期內完成一個名為 “Practice Ready Program” 既課程方可符合第二年續牌既資格。

講完澳洲既情況，咁香港又如何呢？不幸的是，現時香港並沒有任何機構監管移民代理呢個行業，所以人人都可以零門檻入行繼而向人宣稱自己係一個移民顧問。咁澳洲既法規係香港有無效呢？可以好坦白咁講，係無既。

所以係欠缺監管既情況下，小編係好認同某啲用家既感覺 – 覺得係香港既移民代理係良莠不齊，但可惜既係咁樣連帶亦影響埋部份從事呢個行業而又好努力去滿足(海外)發牌要求既註冊代理，令佢地係呢個專業上得唔到應有既信任同尊重。

所以你見到當好多人係網上求 refer 移民顧問時，好多既回應一係就叫你自己做啦唔駛俾錢人賺，一係就叫你唔好搵香港 agent 去搵澳洲本土既 agent 好過。你或者會問，咁係咪真係自己做都做得黎？又係咪澳洲 agent 一定比香港 agent 好？我地下回再講解下。