移民澳洲小百科 - 澳洲既顧問一定比香港好?

上次講到澳洲與及香港移民顧問的比較，首先都要再次建議返大家，無論澳洲好香港好，最好都係選用持有 Registered Migration Agent 資格既移民顧問，避免一啲乜資歷都無係手就話自己係移民顧問既任何人！

今次同大家分享一個小故事，係一個小編未入行前既故事。
小編從前都做過客人角色，都訪尋過好幾間駐港既 agency 想透過佢地幫手申請澳洲簽證。當日小編因為覺得香港顧問收費比澳洲顧問貴，結果誤打誤撞下透過網絡搵到一位駐澳洲既持牌顧問 (我地簡稱佢做 “A” 先生)，希望透過佢既幫忙去申請簽證。俾曬基本個人資料A先生後，佢就提供個報價俾小編，咁小編覺得價錢合理亦都乖乖付款 (因算不上為大銀碼所以全數支付左)。然而付款之後，A 先生失蹤了…無論小編發電郵/致電/留言俾 A 先生，全部都不得要領 。由於A先生身處澳洲，身在香港既小編亦無法越洋去搵 A 先生了解問題所在。
你可能會話，『搞錯呀，收完錢就無左影，投訴佢啦』！ 如果我係局外人我都會咁諗，但當我個人資料全部係A先生手上， 我實在唔敢去投訴佢，怕投訴完佢之後對自己將來申請簽證會帶來不利影響。當然，呢件事發生既機會不大，但當今時今日一個澳洲身份係咁難能可貴時，小編實在唔敢搏。結果，死死地氣，接受現實，重新上路！
故仔就講到呢一度，同大家分享下幾個簽證申請人對移民顧問常見既睇法同埋小編既己見︰
『香港顧問(持牌好唔持牌好) 食水好深，澳洲顧問收得平好多』
係度小編唔 comment 收費既水平，始終每位顧問既服務內容都不盡相同，佢地都有權開出認為合理既收費俾客人參考。小編只係想指出，香港同澳洲係一個好唔同既市場。係澳洲，顧問數量多，競爭相對較大；但另一方面，澳洲營運既支出可能相對較香港少，因澳洲有唔少顧問係以 home office 營運，只係唔駛交租同燈油火蠟營運成本已經差好遠。香港既市場同澳洲有點不同，聽過有人對行家既 comment 係”收費咁貴但個門面咁差劣，一係就唔可靠，一係就謀取暴利啦”。可想而知，係香港如果無一個似樣既門面，縱使顧問處理申請既能力有幾咁高強都好，客人亦難免會覺得唔安心。而香港既鋪租人工…我諗小編唔駛多講大家都明白個高昂程度係如何。咁所以，用同一個價格去放落兩個截然不同既市場去比較，小編認為未免係有啲唔公平。

『澳洲顧問比起香港顧問更熟悉相關申請程序』
其實就住申請簽證所需要既知識而言，持牌既顧問全部都要經過澳洲政府認可既學習過程同考試先可以申請到顧問資格。所以學術層面上顧問既駐地係邊度係無什影響。至於你話顧問既經驗如何，咁就更加係在於唔同顧問既背景同往績，同埋顧問自己有無勤力去 update 申請簽證既相關資訊。小編有朋友就係係澳洲聘用移民顧問申請簽證，但該位顧問似乎無乜更新行情，連體檢/良民證應該幾時做/係邊度做/因肺炎疫情下有無得做都一無所知，全部都要小編幫個朋友問幫佢鋪排…由此可見，就算係駐澳洲既顧問，都唔係一定熟悉申請相關程序。
『宜家乜都可以 online 搞掂，無需要搵一個可以face to face 見面既顧問啦，用澳洲顧問 online 搞掂曬就 ok 啦』
小編當初就係抱住咁既心態無選用到香港顧問，結果俾完錢換來一肚氣仲要無仇報。自此以後，小編都對一啲要係海外聘用既專業服務都有啲介心，怕俾完錢之後人又唔見左影…所以你問小編，如果質素同價錢相差唔太遠，都建議係香港既大家選用返駐港既註冊顧問，起碼有咩疑問你都有機會面對面同移民顧問親身了解。再且，申請簽證過程中好多時都需要申請人提供核證副本或宣誓聲明，持牌既澳洲移民顧問係大部份情況下係可以幫手鑑定正本及監誓，咁申請人就唔駛因為駐外移民顧問未能親身鑑定正本及監誓而要另行花錢花時間再搵第三方安排相關手續。